Fræðsla og kynningar

Hjá Landsbókasafni Íslands - Háskólabókasafni er boðið upp á fjölbreytta fræðslu og kynningar sem miða að því að auka upplýsingalæsi og færni í akademískum vinnubrögðum. Þessi þjónusta er fyrir nemendur Háskóla Íslands en einnig er reynt að sinna óskum annarra hópa fyrir heimsóknir og kynningar. Fræðsla og kynningar fyrir nemendur Háskóla Íslands er skipulögð að beiðni námsbrauta og/eða einstakra kennara.

Fræðsluleiðir fyrir nemendur við Háskóla Íslands

  • Almenn kynning fyrir nýnema (40 mínútur) 
    Áhersla er lögð á að kynna vinnuaðstöðu og þjónustu sem nemendum stendur til boða auk helstu upplýsingaleiða og fjallað um leitartækni, leitir.is, Áttavitann og vef Lbs-Hbs. Beiðni um kynningu
  • Frumkynning fyrir nemendur á fyrsta námsári (90 mínútur, 2 x 45 mín)
    Kynnt er vinnuaðstaða og þjónusta sem stendur nemendum til boða ásamt helstu upplýsingaleiðum og fjallað um leitartækni, leitir.is, Áttavitann og vef Lbs-Hbs. Í fræðslunni er auk þess lögð áhersla á einstök fræðasvið í samráði við kennara og kynnt helstu gagnasöfn í viðkomandi fræðigrein. Beiðni um kynningu
    Kynningar geta farið fram í Þjóðarbókhlöðu eða í húsum Háskóla Íslands. 
  • Fræðsla tengd verkefnavinnu í einstökum námskeiðum
    Fyrir alla nemendur HÍ hvenær sem er á námstímanum. Miðað er við að leiðbeina nemendum um leiðir í heimildaleit fyrir verkefni í einstökum námskeiðum. Fræðslan getur bæði farið fram í húsakynnum safnsins í Þjóðarbókhlöðu eða kennarar pantað upplýsingafræðing í tíma. Beiðni um fræðslu
  • Hagnýt upprifjun í tengslum við lokaverkefni (40 mínútur)
    Farið er í ýmis hagnýt atriði varðandi heimildaleitir, skil í Skemmu o.fl., allt eftir óskum kennara. Beiðni um upprifjun

Aðrar kynningar

  • Almennar kynningar og leiðsögn um safnið fyrir hópa
    Kynning í fyrirlestrarsal á 2. hæð þar sem sagt er í stuttu máli frá sögu og hlutverki safnsins, safnkosti og skipulagi. Hægt er að óska eftir skoðunarferð um Þjóðarbókhlöðuna. Beiðni um almenna kynningu og leiðsögn um safnið