Gjafir

Landsbókasafn Íslands - Háskólabókasafn tekur við gjöfum sem styrkja safnkostinn og eru í samræmi við aðfangastefnu þess. Þeir sem vilja gefa færa safninu gjafir þurfa, áður en til þess kemur, að hafa samband við tengiliði safnsins. Talsverður kostnaður er við móttöku, skráningu og geymslu safnefnis og því þarf að vera vakandi fyrir því að viðtekið efni muni nýtast gestum þess. Safnið tekur við íslensku og Íslandstengdu efni ef það er ekki til fyrir eða ef aukaeintaka er þörf. Safnið tekur einnig við efni sem styrkir safnkost þess á fræðasviðum Háskóla Íslands eða nýtist íslensku rannsóknarsamfélagi.

Ráðstöfun gjafa

Safnið áskilur sér rétt til að fara með gjafir eins og annan safnkost og ráðstafa þeim að vild. Sömu reglur um notkun, staðsetningu og grisjun gilda um gjafir og annað efni. Ef um umfangsmiklar gjafir er að ræða getur verið hentugra fyrir safnið að velja úr efni á heimili eða skrifstofu gefanda. Ef efni er mjög sérhæft er gjarnan fenginn sérfræðingur til aðstoðar við val. Gefendur geta, ef þeir vilja, sótt rit sem ekki eru tekin í safnið innan ákveðins tíma. Að þeim tíma loknum ráðstafar safnið bókunum til annarra eða fargar þeim. Gefendur geta óskað eftir skrá yfir það efni sem tekið er inn í safnið.

Safnið tekur ekki við...

Safnið tekur að öðru jöfnu ekki við aukaeintökum bóka sem þegar eru til, stökum tímaritsheftum, tímaritum sem eru til í rafrænum aðgangi, úreltum kennslubókum eða handbókum og efni á formi sem er óaðgengilegt. Ekki er tekið við óhreinum eða útkrotuðum bókum í slæmu ástandi.

Móttaka gjafa

Algengast er að gjafir séu afhentar óformlega nema þegar þær eru sérlega viðamiklar eða verðmætar. Þá getur verið um að ræða formlega afhendingu í samráði gefenda og safnsins. Í öllum tilvikum þarf móttaka gjafa formlega afgreiðslu safnsins. Hafa skal samband við tengiliði vegna móttöku gjafa.

Tengiliðir

  • Bækur og tímarit: Sigurður Örn Guðbjörnsson, sími 525-5717, sigurdurorn (hjá) landsbokasafn.is
  • Bréf og handrit: Bragi Þ. Ólafsson, sími 525-5677, bragi (hjá) landsbokasafn.is
  • Tónlist og myndefni: Bryndís Vilbergsdóttir, sími 525-5774, bryndisv (hjá) landsbokasafn.is