Námsmenn

Safnið er bókasafn Háskóla Íslands og samkvæmt þjónustusamningi við háskólann hafa nemendur HÍ forgang að lesbásum á 3. og 4. hæð á prófatíma sem og að ýmiss konar þjónustu. Þannig fá nemendur háskólans bókasafnsskírteini endurgjaldslaust og helmingsafsláttur er veittur af gjaldskyldri þjónustu, svo sem millisafnalánum og leigu á aðstöðu (sjá nánar gjaldskrá safnsins).

Skil á lokaverkefnum við Háskóla Íslands

Skemman er rafrænt varðveislusafn lokaverkefna íslenskra háskólanema. Nemandi sem hyggst útskrifast frá Háskóla Íslands skal skila inn rafrænu eintaki af lokaverkefni sínu í Skemmuna sbr. 54. gr. reglna fyrir Háskóla Íslands nr. 569/2009.
Markmiðið með Skemmu er m.a. að opna sem flestum aðgang að fræðilegu efni og eru nemendur hvattir til að hafa ritgerðir sínar opnar. Sumar deildir hafa sett reglur varðandi aðgang að lokaverkefnum og er nemendum bent á að kynna sér vel verklagsreglur eða aðrar leiðbeiningar um lokaverkefni í sinni deild.
Auk eintaks af lokaverkefni skal nemandi skila í Skemmu yfirlýsingu um það hvernig aðgangi að verkefni hans skuli háttað.
Leiðbeiningar um skil í Skemmu.
Doktorsritgerðum skal skila í rafræna varðveislusafnið Opin vísindi.
Leiðbeiningar um skil í Opin vísindi.
Í Um góða starfshætti við kennslu og próf í Háskóla Íslands segir í 7. lið „Stúdentum er algerlega óheimilt að nýta sér hugverk annarra í ritgerðum og verkefnum, nema heimilda sé getið í samræmi við viðurkennd fræðileg vinnubrögð“.
Háskóli Íslands notar Turnitin forritið til varnar ritstuldi og sem stuðning við fræðileg skrif og gera ýmsar deildir kröfu um að nemendur skili eintaki lokaverkefnis í Turnitin.

Áttavitinn

Áttavitinn er vefur með leiðarvísum um heimildaleit og heimildaskráningu, notkun gagnasafna og tenglum á margvíslegt fræðsluefni. Sérstakir leiðarvísar eru til fyrir mörg fræðasvið. 

Önnur bókasöfn Háskóla Íslands

Safnið starfrækir bókasafn fyrir lagadeild Háskóla Íslands á 3. hæð í Lögbergi. Menntavísindasvið er með eigið bókasafn í Stakkahlíð og Heilbrigðisvísindabókasafn Landspítala-Háskólasjúkrahúss og Háskóla Íslands er við Rauðarárstíg 10. Sjá nánar.

Þjónusta við fjarnema

Þeir sem skráðir eru í fjarnám við Háskóla Íslands hafa sömu réttindi og skyldur við safnið og aðrir nemendur háskólans og leitast er við að veita þeim sambærilega þjónustu. Fjarnemar utan höfuðborgarsvæðisins geta fengið bækur sendar með pósti og greiðir safnið póstburðargjald aðra leiðina. Beiðnir um bókasendingar má senda með tölvupósti á utlan (hjá) landsbokasafn.is eða hafa samband við útlánadeild í síma 525-5681. 
Æskilegt er að notendur velji sér lykilorð í þjónustuborði Þjóðarbókhlöðu eða í öðru bókasafni fyrir innskráningu á Leitir.is til þess að taka frá rit sem er í láni, panta millisafnalán, endurnýja lán o.fl.