Sýningar

08.09.2017

Smekkleysa 30 ára

Fimmtudaginn 7. september var opnuð sýning  í Þjóðarbókhlöðu í tilefni af 30 ára afmæli útgáfufélagsins Smekkleysu. Fyrsta útgáfa Smekkleysu var póstkort gefið út í tilefni leiðtogafundarins í Höfða haustið 1986. Afrakstur sölunnar var notaður til að fjármagna fyrstu plötu Sykurmolanna sem innihélt lagið „ammæli“. Haustið 1987 var lagið gefið út í Bretlandi og einkunnarorð Smekkleysu, „heimsyfirráð eða dauði“ fengu nýja merkingu í kjölfar þeirrar velgengni sem Sykurmolarnir nutu næstu árin og í framhaldi af því fleiri íslenskir listamenn. Á sýningunni gefur að líta úrval veggspjalda og annarrar útgáfu frá níunda áratugnum, einnig í aðdraganda stofnunar Smekkleysu þegar Grammið, Medúsa, Eskvímó og fleiri gáfu út efni listamanna sem tilheyrðu hinni svokölluðu nýbylgju og höfðu tileinkað sér einskonar sjálfsþurftarbúskap utan hefðbundinna útgáfufyrirtækja er varð grunnurinn að stofnun Smekkleysu.

Sýningarskrá (PDF)

➜ Eldri sýningar