Sýningar

Rússneska byltingin 1917 og áhrif hennar á Íslandi

Byltingin í Rússlandi er einn af afdrifaríkustu atburðum 20. aldar og hún hafði mótandi áhrif á stjórnmál um allan heim. Um var að ræða röð uppreisna í Rússlandi sem leiddu fyrst til þess að einræðisstjórn Rússakeisara var hrundið en síðan til valdatöku ráða eða sovéta undir stjórn bolsévika. Hin svokallaða októberbylting hófst í Tallinn 23. október 1917, en tveimur dögum síðar í Pétursborg (25. október eða 7. nóvember að okkar tímatali).

Síðara skeyti hermir að »Maximalistar« hafi náð ritsímum, talsímum, fréttastofum, bönkum og öðrum stofnunum algerlega á sitt vald.

Fregnir voru í fyrstu stopular hér á landi af rússnesku byltingunni, enda fyrri heimstyrjöldin í fullum gangi. Þann 17. mars 1917 birtist stutt símfregn í Morgunblaðinu um að Rússakeisari hefði lagt niður völd og væri fangi þingsins. Þann 20. mars birtist ítarlegri grein í blaðinu þar sem er fjallað á jákvæðan hátt um byltinguna í Rússlandi. Í Vísi segir þann 8. nóvember að alvarlegar skærur séu á milli rússnesku stjórnarinnar og „maximalista“ (bolsévika). Lengri grein birtist í Morgunblaðinu þann 10. nóvember þar sem sagði að „maximalistar“ hefðu náð ritsímum, talsímum, fréttastofum, bönkum og öðrum stofnunum algerlega á sitt vald og Lenín væri orðinn einvaldur. Lítil sýning hefur verið sett upp í safninu um rússnesku byltinguna.

Á vefnum bækur.is má lesa eftirfarandi rit tengd rússnesku byltingunni:

➜ Eldri sýningar