Fréttir

Málþing um Eirík Magnússon

Málþing um Eirík Magnússon bókavörð í Cambridge (1833-1913) í Þjóðarbókhlöðu laugardag 20. apríl 2013 kl. 14-16:30.

Laugardaginn 20. apríl 2013 kl. 14-16:30 verður haldið málþing og opnuð sýning í Þjóðarbókhlöðu í tilefni af 100. ártíð Eiríks Magnússonar bókavarðar í Cambridge (1833-1913). Eiríkur var menntaður guðfræðingur en sinnti fræðastörfum á mörgum sviðum. Hann var mikilvirkur þýðandi og útgefandi ýmissa fornrita, guðfræðirita, ljóða og sálma, þjóðsagna og ævintýra. Eiríkur hafði í áraraðir merka samvinnu við George Powell og William Morris um þýðingar og útgáfu á íslenskum bókmenntum. Þeir Powell þýddu m.a. flestar af þjóðsögum Jóns Árnasonar sem komu út í tveim bindum 1864 og 1866. Eiríkur og Morris þýddu mörg öndvegisverk íslensk eins og Heimskringlu, Grettis sögu, Völsunga sögu og Gunnlaugs sögu ormstungu. Eiríkur þýddi  Völuspá á ensku og einnig m.a. sálminn „Allt eins og blómstrið eina“ eftir Hallgrím Pétursson. Einnig þýddi Eiríkur á íslensku, m.a. Ofviðrið (The Tempest) eftir Shakespeare og För pílagrímsins frá þessum heimi til hins ókomna (Pilgrim´s Progress) eftir John Bunyan. Eiríkur var mikill baráttumaður fyrir hagsmunum Íslands. Hann hafði talsverð samskipti við Jón Sigurðsson þar sem báðir voru Geirungar, félagar í Atgeirnum, deild innan Hins íslenska þjóðvinafélags. Hann var einnig baráttumaður fyrir „opnum bókasöfnum“ sem nýttust öllum almenningi og setti fram hugmyndir um framtíðarbókasafnið sem hann hugsaði sér að yrði spírallaga og mætti bæta við út frá miðju.

Ávörp við upphaf málþingsins á laugardag flytja Ingibjörg Steinunn Sverrisdóttir landsbókavörður og Katrín Jakobsdóttur mennta- og menningarmálaráðherra. Erindi flytja Pétur Pétursson, prófessor við Háskóla Íslands, Auður Styrkársdóttir, forstöðukona Kvennasögusafns Íslands, Dr. Andrew Wawn, prófessor við háskólann í Leeds á Englandi og Guðjón Jensson, bókasafnsfræðingur.

Dagskrá:

14:00: Ávörp:

Ingibjörg Steinunn Sverrisdóttir landsbókavörður,

Katrín Jakobsdóttur mennta- og menningarmálaráðherra.

14:20: Pétur Pétursson, prófessor við Háskóla Íslands:
„Guðfræðingurinn Eiríkur Magnússon.“

14:40: Auður Styrkársdóttir, forstöðukona Kvennasögusafns Íslands:
„Sigríður Einarsdóttir Magnússon (1831-1915).“

15:00: Kaffihlé og opnun sýningar.

15:30: Dr. Andrew Wawn, prófessor við háskólann í Leeds á Englandi:
Eiríkur Magnússon - meistari og fræðimaður.“

15:50: Guðjón Jensson, bókasafnsfræðingur:
„Bankamálið og samskipti Eiríks Magnússonar við Skúla Thoroddsen.“

➜ Fréttasafn