21.08.2013

Heimskommúnisminn og Ísland

Sýning og fyrirlestrar í Þjóðarbókhlöðu föstudaginn 23. ágúst 16–18

Föstudaginn 23. ágúst 2013 kl. 16-18, verður opnuð í Þjóðarbókhlöðu sýningin Heimskommúnisminn og Ísland sem fjallar um hina alþjóðlegu kommúnistahreyfingu og starfsemi hennar á Íslandi. Evrópuþingið hefur lýst 23. ágúst Evrópudag minningarinnar um fórnarlömb stalínismans og nasismans en þennan dag árið 1939 gerðu Hitler og Stalín griðasáttmála sem hleypti af stað heimstyrjöldinni síðari. Rannsóknarsetur um nýsköpun og hagvöxt (RNH) stendur að sýningunni í samstarfi við Landsbókasafn Íslands-Háskólabókasafn.

Höfundur hennar er dr. Hannes Hólmsteinn Gissurarson prófessor. Sögumiðlun ehf sér um sýningarhönnun. Tveir erlendir fræðimenn halda erindi af þessu tilefni. Eistneski sagnfræðingurinn og þingmaðurinn dr. Mart Nutt flytur erindið „Eistland: Smáþjóð undir oki erlendis valds“ og pólski sagnfræðingurinn dr. Pawel Ukielski, forstöðumaður Minningarsafns um uppreisnina í Varsjá 1944, flytur erindi um hina sögulegu uppreisn 1944. Varðberg, samtök um vestræna samvinnu og alþjóðamál, og Alþjóðamálastofnun Háskóla Íslands standa að fyrirlestrum þeirra Nutts og Ukielskis ásamt RNH. Þessi viðburður er einnig þáttur í samstarfsverkefni RNH og AECR, Evrópusamtaka íhaldsmanna og umbótasinna, um „Evrópu fórnarlambanna“.

Sjá nánari upplýsingar á: http://www.rnh.is/

Mynd: Ungir kommúnistar á Siglufirði undir mynd af Lenín í september 1930.

➜ Fréttasafn