04.04.2014

Michel Butor og vinir – sýning á Listahátíð í maí

Opnuð verður sýning í Þjóðarbókhlöðu á bókverkum Michels Butor og tólf listamanna á Listahátíð í Reykjavík mánudaginn 26 maí. Michel Butor er einn af fremstu höfundum hóps sem umbylti skáldsögunni í Frakklandi um 1960 undir merkjum nýju skáldsögunnar („nouveau roman“). Butor hætti að skrifa skáldsögur á sjöunda áratugnum. Síðan hefur hann skrifað mjög mikið af ritgerðum, ljóðum, ferðasögum og alls kyns tilraunatextum. Áratugum saman hefur hann einbeitt sér að textum fyrir myndlistarbókverk, hefur gert  fjölda slíkra verka  með afar mörgum myndlistarmönnum og haldið fyrirlestra um bókverk víða. Því má segja að bókmenntaferill Butors sé tvískiptur, annarvegar er „fyrra líf“ hans sem nýsöguhöfundur og hinsvegar textar hans fyrir myndlistarbókverk, ásamt alls kyns öðrum textum. Verkefnið er samstarf Landsbókasafns Íslands – Háskólabókasafns, Listaháskóla Íslands, Háskóla Íslands, Franska sendiráðsins, Alliance française og Listahátíðar í Reykjavík. Sýningin stendur út ágústmánuð.

Sjá nánar á vef Listahátíðar í Reykjavík

http://www.listahatid.is/vidburdir/michel-butor-og-vinir/

Michel Butor

➜ Fréttasafn