12.01.2015

Íslensk bókaskrá 1534-1844

Á tuttugu ára af mæli Landsbókasafns Íslands – Háskólabókasafns 1. desember 2014 var opnað fyrir aðgang að íslenskri bókaskrá til 1844 á vefslóðinni bokaskra.landsbokasafn.is. Sögu bókaskrárinnar má rekja aftur til miðrar síðustu aldar en þá hófst vinna við það í Landsbókasafni Íslands að semja bókfræðilega skrá yfir öll rit íslenskra höfunda, rit erlendra höfunda prentuð á íslensku og rit erlendra höfunda á erlendum tungum ef prentuð hefðu verið hér á landi. Fyrsti hluti skrárinnar átti að ná yfir tímabilið frá 1534 til 1844 eða frá upphafi prentunar á Íslandi til þess að prentsmiðjan var flutt frá Viðey til Reykjavíkur. Til stóð að skráin yrði gefin út og var unnið að henni fram á sjöunda áratug aldarinnar og var afrakstur þess fullsett prentsmiðjuhandrit. En skráin kom aldrei út á þessum tíma. Árið 2005 var í Landsbókasafni Íslands – Háskólabókasafni byrjað að huga að skránni á ný og var fljótlega ákveðið að birta hana með stafrænum hætti á netinu. Í skránni má finna nákvæma bókfræðilega lýsingu á hverju riti og er titill skrifaður upp stafréttur. Auk þess eru athugasemdakaflar við flestar færslur með ýmsum viðbótar upplýsingum um eintök, prentafbrigði, skreytingar, heimildir og fleira.

➜ Fréttasafn