Kjörgripur mánaðarins

Dagbækur Elku Björnsdóttur

Elka Björnsdóttir (1881-1924), verkakona í Reykjavík, hélt dagbækur á árunum 1915–1923, og eru þær einstök heimild um líf þessarar verkakonu ásamt því að vera hafsjór af fróðleik um hina ýmsu atburði sem áttu sér stað á Íslandi á þessum árum.

Elka fylgdist með þjóðmálunum og hafði áhuga á jafnréttismálum og bættum kjörum verkafólks. Hún var einnig mjög áhugasöm um menningarmál og ýmis framfaramál.

Dagbók hennar endurspeglar harða lífsbaráttu og slæman aðbúnað fátæks fólks í Reykjavík á árum fyrri heimsstyrjaldar. Margir merkisatburðir áranna 1915-1923 koma við sögu í dagbókum Elku eins og frostaveturinn, spænska veikin, Kötlugosið og fullveldið 1918.

Dagbækur Elku Björnsdóttur hafa nýlega verið gefnar út hjá Háskólaútgáfunni í ritröðinni Sýnisbók íslenskrar alþýðumenningar. Þær eru varðveittar á handritasafni Landsbókasafns Íslands – Háskólabókasafns. Fyrstu dagbókarfærsluna ber upp á sumardaginn fyrsta fyrir réttum 100 árum, 22. apríl 1915.

Hægt er að skoða stafræna endurgerð dagbókanna á handrit.is.

➜ Eldri kjörgripir