Hinn 13. október s.l. færði Steingrímur Jónsson Landsbókasafninu að gjöf sænska bóksögutímaritið Biblis sem komið hefur út síðan 1957.

Það var Föreningen för bokhantverk sem gaf ársritið út í upphafi og allt til 1997. Þá tók Hollvinafélag Konunglega bókasafnsins í Svíþjóð – sem einnig heitir Biblis – við útgáfunni og gerði ritið að ársfjórðungsriti. Síðan þá hafa komið út 110 hefti, hið síðasta nú seinnipartinn í sumar.

Biblis er í dag eina bóksögutímaritið sem út kemur á Norðurlöndunum eftir að Nordisk tidskrift för bok- och biblioteksväsen lagðist af fyrir um 20 árum eftir að hafa komið út í nærri hundrað ár.

Það segir sig sjálft að margir helstu fræðimenn á sviði sænskrar bóksögu hafa komið að Biblis gegnum tíðina, því auk hefðbundinnar bóksögu fjalla greinarnar um bókatengd menningarsöguleg efni í víðasta skilningi.

Landsbókasafnið gerðist fyrir nokkru áskrifandi að stafrænni útgáfu síðustu árganganna af Biblis. En nú er ritið sem sagt allt aðgengilegt í safninu.