Þriðjudaginn 27. október var opnuð sýning í tilefni þess að 60 ár eru liðin frá því að Halldór Laxness hlaut bókmenntaverðlaun Nóbels. Sýningin er í samstarfi Gljúfrasteins – húss skáldsins, RÚV og Landsbókasafns Íslands – Háskólabókasafns.
Á sýningunni gefur að líta margvísleg skjöl úr skjalasafni Halldórs Laxness sem varðveitt er í Þjóðarbókhlöðunni, muni frá Gljúfrasteini og Nóbelsverðlaunin sjálf sem eru í vörslu Seðlabanka Íslands. Þá hefur RÚV unnið sérstakan vef sem tileinkaður er Nóbelsverðlaunum Halldórs Laxness.
Þórarinn Eldjárn rithöfundur skrifar texta sýningarinnar en sýningarteymið skipa þau Guðný Dóra Gestsdóttir, Bragi Þ. Ólafsson og Ólafur J. Engilbertsson. Sýningin stendur fram til 31. mars 2016.