Skáldið Natasha S. hefur hlotið Maístjörnuna, ljóðabókaverðlaun Rithöfundasambands Íslands og Landsbókasafns Íslands – Háskólabókasafns, fyrir ljóðabók sína Mara kemur í heimsókn.

Verðlaunin voru afhent við hátíðlega athöfn í Þjóðarbókhlöðunni í dag. Þetta er í tíunda sinn sem Maístjarnan er veitt, en hún hefur verið veitt árlega frá árinu 2017 og er eina viðurkenning sinnar tegundar á Íslandi sem eingöngu er veitt fyrir útgefnar ljóðabækur.

 

Í umsögn dómnefndar er bókin sögð „sterk og heildstæð, ástríðufull og heiðarleg, persónuleg og pólitísk“ og lýsir hún á áhrifaríkan hátt kvíða, vanmætti og ógnum samtímans. Ljóðmælandi tekst á við ótta sinn í martraðarkenndum veruleika þar sem persónuleg reynsla og alþjóðlegir atburðir fléttast saman.

 

Bókin Mara kemur í heimsókn kom út árið 2025 og fjallar meðal annars um heimkomu höfundar til Rússlands eftir langa fjarveru. Hún er jafnframt uppgjör við pólitískt og menningarlegt ástand samtímans og varpar ljósi á togstreitu milli persónulegra tengsla og breyttrar heimsmyndar.

 

Natasha S. er íslenskur rithöfundur af rússneskum uppruna sem hefur vakið verðskuldaða athygli fyrir ljóð, greinar og ritstjórnarstörf. Fyrsta ljóðabók hennar, Máltaka á stríðstímum (2022), hlaut Bókmenntaverðlaun Tómasar Guðmundssonar og var einnig tilnefnd til Maístjörnunnar.

Maístjarnan er veitt þeim ljóðabókum sem gefnar eru út á Íslandi og berast í skylduskil til Landsbókasafns Íslands – Háskólabókasafns. Verðlaununum er ætlað að vekja athygli á blómlegri ljóðaútgáfu og mikilvægi ljóðlistar í íslensku menningarlífi.

 

Landsbókasafn Íslands – Háskólabókasafn óskar Natöshu S. innilega til hamingju með viðurkenninguna.