Landsbókasafn hefur lánað mörg handrit á sýninguna Heimur í orðum í Eddu og nú er einn helsti dýrgripur safnsins kominn í einn sýningarkassann.
Það er handrit sem oftast er nefnt „Kringlublaðið“ og ber safnmarkið Lbs fragm 82. Það er stakt skinnblað, kallað brot eða fragment í handritafræðum, og er skrifað um 1260. Áður tilheyrði blaðið stærri bók, handritinu Kringlu sem innihélt vandaðan texta af Heimskringlu Snorra Sturlusonar. Textinn á blaðinu er úr Ólafs sögu helga.
Fyrir utan þetta staka blað fórst handritið í brunanum mikla í Kaupmannahöfn árið 1728. Ástæða þess að það varðveittist er að árið 1682 skrifaði Íslendingurinn Jón Eggertsson Kringlu upp fyrir Sænska fornfræðaráðið. Þá mun hann hafa tekið blaðið úr handritinu og farið með það til Svíþjóðar þar sem það var varðveitt í Konunglega bókasafninu í Stokkhólmi. Þar uppgötvaði Finnur Jónsson prófessor blaðið í lok 19. aldar þegar hann vann að útgáfu á Heimskringlu.
Karl XVI Gústaf Svíakonungur færði íslensku þjóðinni blaðið að gjöf í heimsókn sinni til Íslands árið 1975 og skyldi það varðveitt í Landsbókasafni. Blaðið er sjaldan tekið úr geymslum safnsins, enda þarf að gæta vel að varðveislu þess. Næstu þrjá mánuði gefst því einstakt tækifæri til að berja þetta merka blað augum á sýningunni í Eddu.
Blaðið hefur auk þess verið myndað og hægt að skoða það hér: https://handrit.is/manuscript/view/is/LbsFragm-0082
Fróðlega grein Stefáns Karlssonar handritafræðings um Kringlublaðið má lesa í Árbók Landsbókasafns frá árinu 1976: https://timarit.is/page/3137404?iabr=on