Þann 9. september fór fram afhending bókagjafar til Landsbókasafns Íslands – Háskólabókasafns á vegum READ JAPAN PROJECT 2025, verkefnis sem hefur það að markmiði að efla þekkingu og skilning á Japan.

Alls bárust safninu 44 enskar bækur um japanskt samfélag, sögu, menningu, bókmenntir, tungumál, stjórnmál og alþjóðamál, auk manga-verka. Bækurnar munu styrkja safnkost safnsins og auðvelda nemendum, fræðafólki og almenningi að nálgast fjölbreytt efni um Japan.

Við athöfnina fluttu Örn Hrafnkelsson landsbókavörður og Takewaka sendiherra Japans á Íslandi ávörp. Að henni lokinni gafst gestum kostur á að kynna sér bókakostinn sem vakti mikinn áhuga meðal viðstaddra.

READ JAPAN PROJECT er alþjóðlegt verkefni sem stuðlar að auknum skilningi á Japan með því að færa bókasöfnum, háskólum og rannsóknastofnunum um allan heim bókagjafir á ensku um japanskt samfélag og menningu.

Landsbókasafn Íslands þakkar sendiráði Japans á Íslandi, Tokyo Foundation og The Nippon Foundation fyrir þessa höfðinglegu gjöf sem mun nýtast vel til náms, rannsókna og aukins skilnings á japanskri menningu og samfélagi.