Opnuð hefur verið lítil sýning um bókasafnarann, fræðimanninn og lögregluþjóninn Jón Jónsson Borgfirðing (1826–1912) á 1. hæð Þjóðarbókhlöðu. Jón safnaði bókum og handritum víða um land af mikilli elju um miðbik nítjándu aldar sem síðar rötuðu til Landsbókasafns. Í gegnum söfnunina öðlaðist hann dýrmæta þekkingu á íslenskri bóksögu og leituðu margir til hans varðandi upplýsingar um íslenskar bækur, blöð og tímarit, bæði innlendir og erlendir fræðimenn. Hann tók jafnframt saman rit á því sviði sem má sjá á sýningunni ásamt ýmsum gripum úr fórum afkomenda hans. Sýningin stendur fram undir lok nóvember.