Sjón er sögu ríkari
Um prentmyndasmíði á Íslandi
Sýning í Þjóðarbókhlöðu
11.05.2020 - 31.12.2020
![](https://landsbokasafn.is/uploads/news/id1441/sjon_er_sogu_rikari_banner.jpg)
Sjón er sögu ríkari – sýning á aðferðum við gerð prentmyndmóta sem opnuð hefur verið í safninu er tileinkuð Ólafi Hvanndal prentmyndasmið [1879-1954]. Haustið 2019 voru liðin 100 ár frá því að fyrirtæki hans Prentmyndagerðin tók til starfa á loftinu í Þingholtsstræti 6 og 70 ár síðan hann afhenti Landsbókasafninu afþrykk af öllum myndamótum sínum. Ólafur var frumkvöðull breytinga í prentverki hér á landi sem eru ekkert síður mikilvægar en upphaf prentlistar hér á Íslandi með notkun lausaletursins. Sýningin er hluti af rannsóknarverkefninu Sjónarfur í samhengi, þar sem Guðmundur Oddur Magnússon (Goddur) rannsóknarprófessor við Listaháskóla íslands og Unnar Örn myndlistarmaður beina sjónum að notkun myndmáls í prentsögu Íslands frá 1844–1944. Verkefnið er stutt af rannsóknarsjóði Rannís og er samstarf Listaháskóla Íslands, Landsbókasafns Íslands – Háskólabókasafns og Hönnunarsafns Íslands. Goddur var með hádegisfyrirlestur í safninu af þessu tilefni miðvikudaginn 24. júní kl. 12.10.
Sýningin stendur til 31. desember 2020.
![](https://landsbokasafn.is/uploads/news/id1441/Prentmyndasmidja_smaller.jpg)
![](https://landsbokasafn.is/uploads/news/id1441/Olafur_Hvanndal_smaler.jpg)