Jólaútgáfur

Örsýning

Sýning í Þjóðarbókhlöðu

01.12.2019 - 19.01.2020

Í tilefni aðventunnar hefur verið sett upp í anddyri safnsins örsýning á nokkrum jólatengdum útgáfum frá undanförnum 100 árum eða svo.
Hér eru frumsamdar íslenskar bækur um jólin, ársrit tengd jólum, þýddar bækur og hljómplötur.

Á árunum 1917-1922 gaf Steindór Gunnarsson út ársritið Jólagjöfina með margvíslegu efni fyrir börn og um sama leyti gaf K.F.U.M út Jólakveðju. Jólin koma eftir Jóhannes úr Kötl­um kom út 1932. Tryggvi Magnússon myndskreytti bókina. Bókin kom út á tíma sjálfstæðisbaráttunnar þegar þjóðararfurinn gekk í endurnýjun lífdaga. Þjóðsagna­minni voru færð nær þjóðinni og um leið mörkuð sérstaða íslenskrar jólamenningar. Bókin kom nýlega út í enskr­­i þýðingu Hallbergs Hallmundssonar, Christmas is coming.

Jóhannes úr Kötlum gaf einnig út Jólavöku - safn­rit úr íslenzkum bókmenntum 1945. Aðventa eftir Gunnar Gunnarsson var upphaflega samin á dönsku og kom fyrst út í Þýskalandi 1936. Hún var fyrst gefin út í íslenskri þýðingu Magnúsar Ásgeirssonar 1939. Fyrsta útgáfan í íslenskri þýðingu skáldsins sjálfs kom út 1976 og hér má sjá endurútgáfu frá 2007 með myndum eftir Gunnar Gunnarsson yngri. Hið sígilda Jólaævintýri Dickens kom hér fyrst út í þýðingu Karls Ísfeld 1942 og var endurútgefið 2009.

Brian Pilkington er líklega afkastamesti höfundur jólabóka fyrir börn hér á landi á síðustu árum og íslensku jóla­sveinarnir í hans túlkun eru í stöðugri útrás og nýlega kom út bók hans The Yule Cat : a seasonal makeover. Einnig gefur hér að líta Jólasveinana eftir Iðunni Steinsdóttur með myndum Búa Kristjánssonar frá 1993;  Jólasögur úr samtímanum eftir Guðberg Bergsson í útgáfu frá 1995 og Jólabókina 1947 sem Sigurjón Jónsson bjó til prentunar og Halldór Pétursson teiknaði.

Gylfi Garðarsson bjó til prentunar Jólasöngva 1996 og loks má sjá hér nokkrar jólaplötur frá sjötta, sjöunda og áttunda áratugnum með Ingi­björgu Þorbergs, Hauki Morthens, Þuríði Pálsdóttur, Helenu Eyjólfsdóttur, Ómari Ragnarssyni, Þremur á palli og Svanhildi Jakobsdóttur.

Eldri sýningar og viðburðir

Allar sýningar
Kerguelen á Íslandi 1767 og 1768

Kerguelen á Íslandi 1767 og 1768

Sýning í Þjóðarbókhlöðu

Sjá nánar
Sigvaldi Kaldalóns

Sigvaldi Kaldalóns

Sýning í Þjóðarbókhlöðu

Sjá nánar
Netspjall