Maístjarnan, ljóðabókaverðlaun Rithöfundasambands Íslands og Landsbókasafns Íslands – Háskólabókasafns, verða veitt í sjöunda sinn í maí.
Tilnefningar til Maístjörnunnar vegna ljóðabóka útgefinna 2022 voru kynntar við athöfn í Gunnarshúsi miðvikudaginn 26. apríl.
Tilnefndar bækur eru:
Skurn eftir Arndísi Lóu Magnúsdóttur. Útgefandi: Una útgáfuhús
Allt sem rennur eftir Bergþóru Snæbjörnsdóttur. Útgefandi: Benedikt
Sjófuglinn eftir Egil Ólafsson. Útgefandi: Bjartur
Urta eftir Gerði Kristnýju. Útgefandi: Mál og menning
Máltaka á stríðstímum eftir Natöshu S. Útgefandi Una útgáfuhús
Plómur eftir Sunnu Dís Másdóttur. Útgefandi: Mál og menning
Tilnefndar bækur eru allar til sýnis í anddyri Þjóðarbókhlöðu frá og með fimmtudeginum 27. apríl.
Gjaldgengar voru allar útgefnar íslenskar ljóðabækur ársins 2022, alls 93, sem skilað var í skylduskil til Landsbókasafns Íslands – Háskólabókasafns og fékk dómnefnd þær til umfjöllunar. Dómnefnd skipa Arnór Ingi Hjartarson fyrir hönd Rithöfundasambandsins og Emma Björk Hjálmarsdóttir fyrir hönd Landsbókasafnsins.
Verðlaunin verða veitt við athöfn í Þjóðarbókhlöðunni þann 24. maí.
Á myndinni eru Arndís Lóa Magnúsdóttir, Sunna Dís Másdóttir, Bergþóra Snæbjörnsdóttir, Natasha S, Egill Ólafsson og Sigþrúður Gunnarsdóttir f.h. Gerðar Kristnýjar.
Netspjall_
Vinsamlegast kynntu þig með nafni og netfangi.