Miðvikudaginn 13. september voru tvö verkefni kynnt í fyrirlestrasal safnsins á vegum Miðstöðvar stafrænna hugvísinda og lista.

Þeir Trausti Dagsson frá Árnastofnun og Luke O'Brien kynntu Talgreiningu á Ísmús og uppbyggingu textasafns fyrir eldra talmál sem var unnið í samstarfi við Árnastofnun og tæknifyrirtækið Tíró og snerist um gerð talgreinis sem þjálfaður var með hljóðupptökum úr Þjóðfræðisafninu. Upptökurnar hafa nú verið gerðar leitarbærar og aðgengilegar.

Þeir Bragi Þorgrímur Ólafsson frá Landsbókasafni og Unnar Ingvarsson frá Þjóðskjalasafni kynntu íslenska grunninn í Transkribus. Transkribus hugbúnaðurinn er gerður í þeim tilgangi að búa til íslenskan grunn fyrir handskrifaðan texta frá 18. og 19. öld. Verkefnið var unnið í samstarfi við sérfræðinga frá Þjóðskjalasafni Íslands og Landsbókasafni Íslands. Hægt er að nálgast íslenska grunninn með því að hlaða niður Transkribus forritinu.

Að auki sagði Una Haraldsdóttir sagnfræðinemi frá verkefni sínu um dagbækur Sveins Þórarinssonar (föður Nonna og Manna) og reynsluna af því að nota Transkribus í því verkefni. Nánar má fræðast um verkefni Unu á vefnum Akureyri.net