Árið 1932 kom út kvæðakver Jóhannesar úr Kötlum Jólin koma með vísum um íslenskar jólavættir. Jóhannes úr Kötlum notaði að mestu sömu nöfn á sveinana og séra Páll Jónsson á Myrká (1812-1889) sjötíu árum fyrr í þjóðsagnasafni Jóns Árnasonar. Með þessu kvæði sínu má segja að Jóhannes hafi sett í fastar skorður nöfn jólasveinanna, fjölda þeirra og í hvaða röð þeir halda til byggða. Jólasveinarnir eru í bókinni þrettán talsins þó sagnir séu um að þeir hafi verið mun fleiri. Tryggvi Magnússon myndskreytti bókina. Griffla gaf bókina út í enskri þýðingu Hallbergs Hallmundssonar 2015 undir heitinu Christmas is coming : verse for children og 2022 gaf Mál og menning bókina út á pólsku í þýðingu Nina Słowińska undir heitinu Idą święta : wiersze dla dzieci og er af því tilefni sýningin og skráin að hluta á pólsku. Landsbókasafn Íslands - Háskólabókasafn eignaðist árið 1989 frumeintök teikninganna í Jólin koma og eru þær varðveittar í handritasafni. Teikningar Tryggva Magnússonar af jólasveinunum í Jólin koma hafa verið jólakort Landsbókasafns Íslands – Háskólabókasafns undanfarin ár.

Sýningarskrá