Föstudaginn 22. apríl 2016 var opnuð í safninu sýning á ljóðum Snorra Hjartarsonar. Á sýningunni er haldið á loft ljóðaperlum Snorra Hjartarsonar. Kvæðin mæta gestum Þjóðarbókhlöðu á göngum safnsins og þeir geta einnig látið fara vel um sig með spjaldtölvu á sýningarsvæðinu og hlýtt á ljóðin í upplestri Gunnars Þorsteinssonar, þýðanda og þular.
Snorri Hjartarson var fæddur 22. apríl 1906 á Hvanneyri í Borgarfirði, sonur Hjartar Snorrasonar skólastjóra og Ragnheiðar Torfadóttur, en ólst upp í Arnarholti í Stafholtstungum frá níu ára aldri. Hann stundaði nám við Flensborgarskólann í Hafnarfirði og síðan í Menntaskólanum í Reykjavík en varð að hætta þar vegna heilsubrests. Hann hélt utan að leita sér lækninga og lagði síðan stund á listnám í Kaupmannahöfn 1930 og Ósló 1931-´32. Á þessum árum birtust fyrstu ljóð hans, fimm kvæði í tímaritunum Eimreiðinni og Iðunni. Þarna lagði hann einkum stund á málaralist, en sneri sér svo æ meir að ritstörfum.
Ljóðabækur Snorra urðu fjórar talsins: Kvæði (1944), Á Gnitaheiði (1952), Lauf og stjörnur (1966) og Hauströkkrið yfir mér (1979). Fyrir þá síðastnefndu hlaut hann Bókmenntaverðlaun Norðurlandaráðs árið 1981. Árið 1986 sæmdi Heimspekideild Háskóla Íslands hann heiðursdoktorsnafnbót og er hann einn örfárra skálda sem hana hafa fengið. Snorri Hjartarson andaðist í Reykjavík 27. desember árið 1986, þá liðlega áttræður.
Ljóðvegir standa að sýningunni í samstarfi við safnið. Forlagið, Olís, Reykjavík Bókmenntaborg UNESCO, Rithöfundasamband Íslands, RÚV, Samfélagssjóður Landsbankans, Stofnun Vigdísar Finnbogadóttur og Mennta- og menningarmálaráðuneytið veittu verkefninu stuðning.
Sýningunni lauk 30. október 2016.
Netspjall_
Vinsamlegast kynntu þig með nafni og netfangi.
Spjallið er opið 9:00 - 16:00 virka daga.