Safnið útvegar notendum sínum bækur og tímaritsgreinar frá öðrum háskóla- og rannsóknarbókasöfnum. Bækur eru ekki pantaðar frá Borgarbókasafni eða almenningsbókasöfnum á höfuðborgarsvæðinu. Athugið einnig að bókasafn Alþingis og söfn ráðuneytanna lána bækur eingöngu á lestrarsal. Bækur sem eru aðgengilegar á safninu, eru ekki afgreiddar í millisafnalán nema til annarra bókasafna. Notendur geta pantað bækur og greinar úr leitarniðurstöðum á leitir.is með því að skrá sig þar inn.
Ef efni finnst ekki þurfa notendur að biðja um millisafnalán með því að smella á „Millisafnalán” á leitir.is. Þá opnast eyðublað til að panta bók eða grein. Fylla þarf út öll skyldusvið (*) og velja Landsbókasafn Íslands – Háskólabókasafn úr flettilistanum „Bókasafn”. Þetta krefst ekki innskráningar. Beiðnir eru bindandi og því er ósótt efni ávallt gjaldfært á skírteini notenda. Innskráðir notendur geta fylgst með stöðu beiðna á „Mínum síðum“.
Biðtími getur verið mjög mismunandi, allt frá nokkrum dögum upp í nokkrar vikur, eftir því hvert efnið er. Bið eftir greinum er almennt tveir dagar en lágmark vika fyrir bækur. Skilafrestur bóka sem fengnar eru erlendis frá er yfirleitt eftir þrjár til fjórar vikur. Kennarar og starfsfólk Háskóla Íslands fær greinar sendar í innanhússpósti, en nemendur og aðrir notendur þurfa að sækja greinar í afgreiðsluborð útlána. Bækur þurfa allir að sækja í afgreiðsluborð.
Innlend söfn geta pantað millisafnalán frá safninu. Hægt er að gera það beint af leitir.is. Þegar búið er að finna efnið sem á að panta er farið í „Senda til" og „Tölvupóstur" valinn úr felliglugganum. Í nýjum glugga sem opnast er „Beiðni um millisafnlán" sett undir „Efni", setjið netfangið millisafnalan (hja) landsbokasafn.is í „Til". Í athugasemdum ættu síðan að koma fram heiti safns sem pantar og netfang.
Kostnaður vegna kennslu og rannsókna starfsmanna Háskóla Íslands færist á reikning viðkomandi deildar, stofnunar eða rannsóknaverkefnis og er innheimtur tvisvar á ári. Reikningar til fyrirtækja og stofnana eru sendir út ársfjórðungslega. Sjá gjaldskrá
Netspjall_
Vinsamlegast kynntu þig með nafni og netfangi.